Тәжікстанда 60 жастағы науқас көз жұмған соң аурухана карантинге жабылды
Жаббор-Расул ауданындағы орталық ауруханада 60 жастағы науқас қайтыс болғаннан кейін Тәжікстан билігі аурухананы карантинге жапты. Аурухананың 11 дәрігері мен медицина қызметкерінен коронавирус белгілері байқалған. Олар Худжанд қаласындағы инфекциялық ауруханаға жатқызылған. Бұл туралы Азаттықтың Тәжік қызметі хабарлады. 31 наурызда пневмониядан қайтыс болды делінген науқастың туыстарының айтуынша, марқұм жақында Қырғызстанға тойға барған.
Науқастың қайтыс болғанын және аурухананың карантинге жабылғанын Озоди радиосына денсаулық сақтау саласы мен құқық қорғау органындағы бірнеше ақпарат көзі растаған.
5 сәуірде кешке ауруханаға барған Озоди радиосының тілшілері аурухана ауласында қорғаныш костюм киім киіп, медициналық маска таққан адамдар жүргенін көрді. Ауруханадағы күзетшілер де маска таққан. Ауруханаға кіруге тыйым салынған. Күзет қызметкерлерінің айтуынша, "екі науқастың дене қызуы көтерілген".
Денсаулық сақтау саласы мамандарының айтуынша, Худжанд қаласындағы инфекциялық ауруханаға жатқызылған 11 дәрігердің дене қызуы көтерілген. Аурухана қызметкерлері олардың жағдайын ауыр деп бағалайды. Барлығы жеке бокстарға жатқызылған.
Тәжікстан билігі әлі күнге дейін елде коронавирус барын жоққа шығарып келеді. Тәжікстан билігінің ресми мәлімдемесіне күмән келтіретін сыншылар да бар.
Штаб: Қазақстан ғалымдары коронавирусты анықтайтын тест жүйесін жасап шығарды
М. Айқымбаев атындағы карантиндік және зоонозды инфекциялар ғылыми орталығы және ұлттық биотехнология орталығы коронавирусты анықтайтын тест жүйесін жасап шығарды деп хабарлады коронавируспен күрес жөніндегі штаб өкілдері. Президент Қасым-Жомарт Тоқаевтың айтуынша, қысқа уақыт аралығында дайындалған тест жүйесі халықаралық стандартқа сәйкес келеді.
"Әзірленген тест жүйесі мыңдаған азаматымыздың өмірі мен денсаулығын сақтап қалуға көмектеседі деп сенемін" деді Тоқаев.
Қырғызстанда коронавирустан тағы екі адам көз жұмды
Қырғызстан денсаулық сақтау министрі Сабыржан Абдикаримов 6 сәуірде тағы екі адамның коронавирустан көз жұмғанын хабарлады. Барлығы төрт адам вирустан қайтыс болған.
Қырғызстанда науқастардың жалпы саны 216 адамға жетті:
- Бішкек қаласы - 25
- Ош қаласы - 14
- Ош облысы - 80
- Баткен облысы - 4
- Жалалабад облысы - 80
- Шу облысы - 5
- Ыстықкөл облысы - 3
- Нарын облысы - 5
Талас облысында коронавирус тіркелмеген.
Қазақстанда тағы 20 адамнан коронавирус табылды
Қазақстан денсаулық сақтау министрлігі 6 сәуірде түскі сағат 14:49-та 20 адамнан коронавирус табылғанын хабарлады. Жамбыл облысында - 1, Шығыс Қазақстан облысында – 1, Маңғыстау облысында – 2, Қарағанды облысында – 16 адамға вирус жұққаны анықталған.
Елде қазір 604 адамға коронавирус жұқтырды. 45 адам аурудан жазылды. 6 адам қайтыс болды.
Вирус жұқтырған 604 адам мына аймақтарда:
Нұр-Сұлтан қаласы – 219
Алматы қаласы – 116
Шымкент қаласы – 14
Ақмола облысы – 23
Ақтөбе облысы – 11
Алматы облысы – 10
Атырау облысы – 29
Шығыс Қазақстан облысы – 6
Жамбыл облысы – 29
Батыс Қазақстан облысы – 2
Қарағанды облысы – 48
Қостанай облысы – 1
Қызылорда облысы – 37
Маңғыстау облысы – 5
Павлодар облысы – 1
Солтүстік Қазақстан облысы – 25
Түркістан облысы – 28