Нұр-Сұлтанда алты адам Covid-19 дертінен айықты
Қазақстан денсаулық сақтау министрлігі Нұр-Сұлтанда Covid-19 дертінен тағы алты адамның айыққанын хабарлады. Елде барлығы 42 адам аурудан жазылды.
Қазақстанда вирус жұқтырғандар 580-нен асты
Қазақстан денсаулық сақтау министрлігі 5 сәуір сағат 22.05-тегі дерегіне сай, елде тағы 15 адамнан коронавирус табылды: Алматы қаласында –1 адам, Ақтөбе облысында – 1 адам, Атырау облысында – 6, Қызылорда облысында – 6 адам, Қарағанды облысында 1 адам.
Министрлік Нұр-Сұлтанда алты адамның Covid-19 дертінен айыққанын мәлімдеді. Елде қазір 584 адамға коронавирус жұқтырды. 42 адам аурудан жазылды. 6 адам қайтыс болды.
Денсаулық сақтау министрі Елжан Біртанов сәуірдің алғашқы он күнінде елде вирус тарау шегіне жетіп, кейін азая бастайды деп болжайды. Министрдің есебінше, елде 3500 адамға вирус жұғуы мүмкін.
Қазақстанда 15 сәуірге дейін төтенше жағдай. Елдің басым бөлігінде шектеу қойылған. 6 сәуірден бастап Ақтөбе қаласы карантинге жабылады.
Өзбекстан өкпені жасанды желдету аппаратын шығара бастайды
Өзбекстан Словакияның "Chirana" және ресейлік компаниялармен бірігіп, мамыр айынан бастап өкпені жасанды желдету аппараты мен наркозбен тыныс алу құрылғыларын шығара бастайды. Бұл туралы инновациялық даму министрлігі хабарлады.
Министрліктің айтуынша, өндірісті орналастырудың алғашқы кезеңінде шетелдік әріптестер 3 млн доллар көлемінде инвестиция құйып, 30 жұмыс орнын ашады. Екінші кезеңде 5-6 млн доллар көлемінде қаржы құйып, шамамен 100 жұмыс орны ашылады.
"Өкпені жасанды желдету аппараты қазір әлемнің 12 елінде шығарылады. Біздің аппараттар бір саты емес, үш саты бойынша желдетеді. Өзбекстанда мұндай зауыттың болуы мемлекеттің медициналық қауіпсіздігін қамтамасыз етеді" деді CHIRANA+ компаниясының бас директоры Василий Шимко.
Өзбекстан өнімді Тәжікстан, Түркіменстан, Қырғызстан және Ауғанстанға шығаруды жоспарлап отыр.
Соңғы дерек бойынша, Өзбекстанда 342 адамнан коронавирус табылған. 2 адам көз жұмған. 30 адам айыққан.
Алматыда екі науқас жазылып шықты
Алматы қалалық қоғамдық денсаулық сақтау басқармасы 6 сәуірде 1997 және 1998 жылы туған екі науқастың жазылып шыққанын хабарлады. Олардың бірі 15 наурызда Стамбул - Алматы бағыты бойынша ұшып келген. Екіншісі коронавирус жұққан науқаспен байланыста болған. Қалада барлығы 21 науқас дерттен айыққан. Олардың екеуі - бала. Ауруханадан шыққандар 14 күндік карантинге жіберіледі.
Қазақстан бойынша коронавирустан жазылып шыққандардың саны 44 адам болды.
Алматыда 116 адамнан коронавирус табылған. Қазір инфекциялық ауруханаларда 96 науқас емделіп жатыр. 79 адамның жағдайы орташа. Екі ересек адамның жағдайы - өте ауыр. Екі адамның жағдайы - ауыр. 13 адамның халі - орташа ауыр.