ПТР растаған дерек. Қазақстанда бір күнде 62 адамнан коронавирус анықталды
2 қазан күні Қазақстанда 62 адамның коронавирус жұқтырғаны ПТР тестімен расталды. Тәулік ішінде 82 науқас жазылып шыққан. Бұл туралы денсаулық сақтау министрлігі хабарлады.
Шығыс Қазақстан облысы кейінгі айда Covid инфекциясын жұқтырғандардың тәулік көрсеткіші бойынша тұрақты түрде алдыңғы орыннан табылып келеді. Өткен тәулікте облыста 18 науқас тіркеліп, вирус жұқтырғандардың жалпы саны 8787-ге жетті. Бұл – Қазақстан аймақтары бойынша бесінші көрсеткіш.
Солтүстік Қазақстан облысында 13 науқас, Қарағанды облысында 6 науқас, Павлодар облысында 4 науқас анықталды. Нұр-Сұлтан қаласында, Ақмола және Алматы облыстарында үш-үштен; Алматы қаласында, Атырау, Батыс Қазақстан және Қостанай облыстарында екі-екіден; Шымкент қаласында, Түркістан, Ақтөбе және Қызылорда облыстарында бір-бірден науқас тіркелді. Жамбыл және Маңғыстау облысында өткен тәулікте ешкімнен коронавирус табылмады.
Елде коронавирус инфекциясын жұқтырғаны ПТР тестімен расталғандардың жалпы саны 108 106-ға жетті. Оның 103110-ны жазылған, 1720-сы қайтыс болған. Вирус жұқтырғаны расталған бірақ "ілеспе аурудан қайтыс болды" деген жүздеген адамның өлімі Covid жөніндегі ұлттық статистикаға қосылмаған.
Қазақстан үкіметі 1 тамыздан бері ПТР тестімен расталмаған, бірақ ауру белгілері бойынша коронавирусқа ұқсайтын вирустық пневмонияның есебін жүргізіп келеді. 2 қазанға дейін 33212 адамнан коронавирус пневмониясы анықталды. Оның 27337-сі жазылып шыққан, 357-сі қайтыс болған.
Өткен тәулікте 234 адам коронавирус пневмониясына шалдыққан, Covid-ті қосқанда 5 адам қайтыс болған
1 қазанда Қазақстанда 234 адамның коронавирус пневмониясына шалдыққаны анықталды. Пневмонияның осы түрінен 2 адам қайтыс болды. Бір күнде 95 адам жазылып шықты. Бұл туралы денсаулық сақтау министрлігі хабарлады.
1 тамыздан бері коронавирус пневмониясына шалдыққандар 33 212 адамға жеткен. 27 337-сі жазылған. 5 мыңнан астам адам коронавирус пневмониясынан емделіп жатыр. 357 адам қайтыс болған.
Дүйсенбі күні коронавирус жұққаны ПТР-тестпен расталған науқастар арасында 3 адам қайтыс болған. Наурыз айынан бері 1737 адам көз жұмған.
Қазір коронавирус ауруынан 3 279 емделіп жатыр, 64-і – бала. Стационарда – 1 745 адам, амбулаторлық жағдайда 1 534 адам емделіп жатыр. 97 адамның жағдайы ауыр, 11 науқастың жағдайы өте ауыр. 20 адам жасанды тыныс алу аппаратымен дем алып жатыр.
Ресми мәлімет бойынша, Қазақстанда індет кезінде 8,7 мыңнан астам жүкті немесе босанған әйел коронавирус инфекциясы немесе коронавирус пневмониясына шалдыққан. 52 жүкті немесе босанған әйел коронавирус инфекциясынан қайтыс болған. Денсаулық сақтау министрлігі коронавирус пневмониясынан аяғы ауыр бірде-бір әйел қайтыс болмады десе, аймақтың денсаулық сақтау мамандары басқаша мәлімет айтады.
Оқи отырыңыз: "Балаларын сұрай берді". Індет әкеткен жүкті әйелдер
Қазақстанда өткен тәулікте 65 адамнан коронавирус инфекциясы табылды
1 қазанда Қазақстанда 65 адамнан коронавирус инфекциясы табылды. Бір күнде 91 адам жазылды. Денсаулық сақтау министрлігінің 2 қазан таңертең таратқан ақпаратында осындай мәлімет айтылады.
Бейсенбі күні Шығыс Қазақстан облысында - 18, Солтүстік Қазақстан облысында 10 адамнан коронавирус инфекциясы табылған. Шымкент қаласы, Түркістан, Маңғыстау облыстарында науқас тіркелмеген.
Елде коронавирус жұққаны ПТР-тестпен расталған науқастар 108 044 адамға жетті. 90 пайыздан астамы жазылған. 3 мыңнан астам адам коронавирустан емделіп жатыр. Наурыз айынан бері 1734 адам қайтыс болған.
Бұл статистикаға коронавирус пневмониясына шалдыққандар енгізілмеген. Ресми мәлімет бойынша, 1 тамыздан бері 32 мыңнан астам адам халықаралық сарапшылар Covid деп санайтын пневмонияның осы түріне шалдыққан. Бұған қоса, денсаулық сақтау министрлігі коронавирус жұққаны анықталған жүздеген адам өлімін ресми есепке енгізбеген. Арнайы комиссия оларды "ілеспе аурудан қайтыс болды" деп санайды.
Елде пандемия басталғалі бері 200-ге жуық медицина қызметкері коронавирустан қайтыс болған. Дегенмен бұл мәліметте де қарама-қайшылық бар. Осыған дейін мәжіліс депутаты Зәуреш Аманжолованың дерегіне сүйенген жергілікті БАҚ 197 медицина қызметкері қайтыс болды десе, 1 қазанда денсаулық сақтау министрі Алексей Цой індет басталғалы бері 182 дәрігер Covid-тен көз жұмды деп мәлімдеді. Бұған дейін 12,8 мың медицина қызметкеріне індет кезінде коронавирус жұққаны хабарланған. Мемлекет тарабынан коронавирустан қайтыс болған дәрігердің отбасына - 10 млн теңгеден, коронавирус ауруына шалдыққан дәрігерге 2 млн теңгеден өтемақы беріледі.
Коронавирус және пневмония: 8,7 мың аяғы ауыр немесе босанған әйелге Covid жұққан, 52-сі қайтыс болған
Қазақстанда індет тараған наурыз айынан бері 5 мыңнан астам аяғы ауыр немесе босанған әйелден коронавирус инфекциясы табылған. Тамыздан бері 3700 жүкті әйел коронавирус пневмониясына шалдыққан. Денсаулық сақтау министрлігіне қарайтын тауар және қызмет көрсету сапасы мен қауіпсіздігін бақылау департаментінің Азаттыққа жіберген ресми жауабында осындай мәлімет айтылады.
Департаменттің хабарламасындағы ақпарат бойынша, наурыз айынан бері 5059 жүкті немесе босанған әйелге коронавирус инфекциясы (ПТР-тестпен расталған) жұққан. Бұл жалпы науқастар санының 4,7 пайызына тең. 4949 әйел жазылған. 58 әйел қазір стационарда емделіп жатыр. 52 адам қайтыс болған.
Қазақстан 1 тамыздан бері коронавирус пневмониясына жеке код беріп, жалпы пневмониядан ажыратып, бөлек есептеп келеді. Департамент хабарламасында 3700 жүкті әйелдің коронавирус пневмониясына шалдыққаны жазылған. 3645-і жазылған, 55-і стационарда емделіп жатыр.
Алайда кейбір аймақтың денсаулық сақтау басқармасы өкілдері бұған дейін Азаттық тілшілеріне аймақта коронавирус пневмониясынан қайтыс болған әйелдер барын айтқан еді. Мәселен Жамбыл облысында 2 әйел коронавирус пневмониясынан көз жұмған.
Оқи отырыңыз: "Балаларын сұрай берді". Індет әкеткен жүкті әйелдер
Бұған дейін дәрігерлер коронавирустың анадан балаға берілмейтінін, босанған әйелдердің балаларынан вирус табылмағанын хабарлаған.