Өткен тәулікте 300-ге жуық адамнан коронавирус пневмониясы анықталды
29 қыркүйекте Қазақстанда 299 адамның коронавирус пневмониясына шалдыққаны анықталды. Бұл бір күн бұрынғы көрсеткішпен (10) салыстырғанда әлдеқайда көп. Пневмонияның осы түрінен 2 адам қайтыс болды. Бір күнде 96 адам жазылып шықты. Бұл туралы денсаулық сақтау министрлігі хабарлады.
1 тамыздан бері коронавирус пневмониясына шалдыққандар 32 799 адамға жеткен. 27 169-ы жазылған. 5277 адам коронавирус пневмониясынан емделіп жатыр. 353 адам қайтыс болған.
Дүйсенбі күні коронавирус жұққаны ПТР-тестпен расталған науқастар арасында 3 адам қайтыс болған. Наурыз айынан бері 1731 адам көз жұмған.
Қазір коронавирус ауруынан 3 303 емделіп жатыр, 56-ы – бала. Стационарда – 1 881 адам, амбулаторлық жағдайда 1 422 адам емделіп жатыр. 90 адамның жағдайы ауыр, 14 науқастың жағдайы өте ауыр. 21 адам жасанды тыныс алу аппаратымен дем алып жатыр.
Елде коронавирус пневмониясы бөлек есептелгенге дейін яғни, 1 тамызға дейін 8 ай ішінде 256 мың адам пневмонияға шалдыққан. Бұл өткен жылмен салыстырғанда 3,3 есе көп. Оның 35 мыңы маусымда, 152 мыңы шілдеде ауырған. ДСМ мұның ішінде нешеуі коронавирус пневмониясы екенін айтпады. Министрлік бар болғаны 1-8 шілде аралығында пневмония 56,8 мың адамнан анықталғанын, соның 39,7 мыңында коронавирус белгілері болғанын айтты.
1 қыркүйектен бері 104 оқушыға коронавирус инфекциясы жұққан
Қазақстанда жаңа оқу жылы басталғалы бері 104 оқушыға коронавирус жұққан: 33 бала кезекші сыныпта оқыған, 71 бала үйден оқып келген. Олармен байланыста болған адамдар анықталды. 30 қыркүйекте үкімет отырысы кезінде денсаулық сақтау министрі Алексей Цой осылай деп мәлімдеді.
Қазақстанда коронавирусқа байланысты оқушылардың басым бөлігі 1 қыркүйектен бастап қашықтан оқи бастаған. Ресми мәлімет бойынша тек бастауыш сынып оқушылары үшін ғана кезекші сыныптар ұйымдастырылған. Қазір жарты миллионнан астам оқушы (625 мың бала) - офлайн, 2,85 млн оқушы онлайн оқып жатыр.
Денсаулық сақтау министрлігінің мәліметінше, Шығыс Қазақстан (13) және Солтүстік Қазақстан (10) облыстарында коронавирус жұққан оқушылар көбірек анықталған.
Санитарлық талаптарға сәйкес, кезекші сыныптарда оқушылар саны 15-тен аспауы тиіс. Сыныптарға үзіліс әр уақытта жарияланып, оқушылардың сабақ кезінде жақын отыруына тыйым салынған.
Соңғы мәлімет бойынша, Қазақстанда коронавирус пен коронавирус пневмониясына шалдыққандар саны 140 мыңнан асқан. Наурыз айынан бері 2 мыңнан астам адам қайтыс болған. Қазір ондаған бала коронавирустан емделіп жатыр. Денсаулық сақтау министрлігінің хабарлауынша, елде коронавируспен байланысты бала өлімі тіркелмеген.
Қазақстанда тағы 75 адамнан коронавирус инфекциясы табылды, Нұр-Сұлтанда науқастар көбейді
29 қыркүйекте Қазақстанда 75 адамнан коронавирус инфекциясы табылды. Бір күнде 69 адам жазылды. Бұл туралы денсаулық сақтау министрлігі хабарлады.
Өткен тәулікте Шығыс Қазақстан облысында - 22, Нұр-Сұлтан қаласында 16 науқас анықталған. Бір күн бұрын астанада 6 адамнан вирус табылған еді. Шымкент қаласы, Түркістан, Маңғыстау, Қызылорда облыстарында бірде-бір науқас тіркелмеген.
Елде коронавирус жұққаны ПТР-тестімен расталған науқастар 107 908 адамға жетті. Басым бөлігі жазылған. Наурыз айынан бері 1728 адам қайтыс болған.
Бұл статистикаға коронавирус пневмониясына шалдыққандар енгізілмеген. 1 тамыздан бері елде 32,5 мыңнан астам адам коронавирус пневмониясына шалдыққан. 350 адам қайтыс болған. Екі көрсеткішті қосқанда коронавируспен ауырғандар саны 140 мыңнан асады, 2079-ы қайтыс болған. Бұған қоса, коронавирус табылған "ілеспе аурудан" қайтыс болған жүздеген адам өлімі де ресми статистикаға қосылмаған. Кейбір мамандар ресми мәліметке күмән келтіреді.
- Авторы: Бағдат АСЫЛБЕК
Денсаулық сақтау министрінің экс-орынбасары "пара алды" деген күдікпен ұсталды
Дәрі-дәрмектерді экспертизасы ұлттық орталығының бас директоры, бұрын денсаулық сақтау министрінің орынбасары болған Ерік Байжүнісов "бірнеше рет пара алды" деген күдікпен үйқамаққа алынды. Бұл ақпаратты Азаттыққа Антикоррупция қызметі растады.
Ведомствоның мәліметінше, үйқамаққа алынған күдіктіге электронды бақылау құрылғысы (браслет) тағылған.
Жемқорлықпен күрес қызметі тергеу құпиялығына сілтеп, басқа ақпарат беруден бас тартты.
Байжүнісов ұлттық орталықты биыл тамыздан бастап басқарып келген. 2010-2014 жылдары денсаулық сақтау министрінің орынбасары болды. Астана қаласы денсаулық сақтау басқармасының бастығы, Республикалық денсаулық сақтау саласын дамыту орталығының бас директоры болған. Ұлттық орталыққа келгенге дейін ол Әлеуметтік медсақтандыру қорының атқарушы директор қызметін атқарған еді.
Бұған дейін, 2 тамызда денсаулық сақтау министрінің орынбасары Олжас Әбішов "бюджет қаржысын жымқырды" деген күдікпен ұсталған.
14 тамызда дәрі-дәрмек сатылымына жауап беретін "СК-Фармация" компаниясының экс-жетекшісі Берік Шәріп қамауға алынған. Ол елдегі төтенше жағдай кезінде медициналық бұйымдарды сатып алғанда "қызметін асыра пайдаланды" деген күдікке ілінген.
Бұған дейін Антикоррупция қызметінің басшысы Әлібек Шпекбаев екі министрліктің шенеунігіне "цифровизация" бойынша қылмыстық іс қозғалғанын мәлімдеген еді. Ол істің жай-жапсарын ашып айтпаған.
Қазақстан президенті Қасым-Жомарт Тоқаев 10 шілдедегі үкімет отырысында елдегі коронавирус эпидемиясы кезінде барлық әкім мен министрдің жұмысын сынап, Әлеуметтік медсақтандыру және "СК-Фармация" басшыларын қызметтен алуды тапсырған. Сол күні Тоқаев денсаулық сақтау министрін ауыстырып, Елжан Біртановтың орнына Алексей Цойды тағайындады. Біртанов оставкасынан кейін жаңа қызметке тағайындалмай, жұрт көзінен таса болды.