Қазақстан "коронавирус вакцинасын алу" туралы Ресеймен келісімге қол қойды
Қазақстандық "СК-Фармация" квазимемлекеттік компаниясы (дәрі-дәрмек сатып алуға жауапты бірыңғай дистрибьютор) Ресейдің тіке инвестиция қорымен коронавирус вакцинасын алу туралы келісімге қол қойды. Бұл вакцина сынақтың соңғы үшінші кезеңінен толық өтпеген.
Қазақстандық шенеуніктердің Мәскеуге сапары туралы үкімет хабарламасында Нұр-Сұлтанның "Спутник V" вакцинасын сатып алуға дайын екені жазылған. Бұған дейін батыс сарапшылары оның қауіпсіздігі мен тиімділігіне күмән келтірген еді.
"Ресейдің Гамалея атындағы эпидемиология және микробиология ұлттық зерттеу орталығы Қазақстанға қажет вакцина көлемін өндіруге дайын. Тәуекел топқа жататын қазақстандықтарға тегін және ерікті түрде екпе егіледі, екпе сынақтың барлық кезеңінен өткеннен кейін ғана пайдалануға беріледі" делінген хабарламада.
12 тамызда Қазақстан президенті Қасым-Жомарт Тоқаев қыркүйек айында Ресейге вакцина сатып алу бойынша делегация жіберетінін хабарлаған. Бұл қоғамда түрлі пікір туғызған. Денсаулық сақтау министрлігі сынақтың барлық кезеңі аяқталмайынша препаратты алмайтынын мәлімдеген.
Қазір әлемде 100-ден астам коронавирусқа қарсы вакцина жасалып жатыр. Covid-ке қарсы екпені алғаш тіркеген елдердің бірі Ресей қазан айында жаппай егу бағдарламасын жүзеге асыруды жоспарлап отыр. Ал батыс ғалымдары вакцина сынақтың барлық кезеңінен өтпегендіктен оны қауіпсіз және тиімді деп атау әлі ерте деп санайды. 21 тамызда британдық вирусолог мамандардың пікіріне сүйенген Reuters агенттігі препарат вирустың мутациялануына жол ашуы мүмкін деген. Ал ондай жағдайда вакцина тиімсіз болып шығады. Ресей мұны жоққа шығарады.
Оқи отырыңыз: Путин Covid вакцинасын жасадық дейді. Мамандар күмән келтіреді
Ресейде коронавирус вакцинасы Гамалея атындағы мемлекеттік зерттеу орталығының көмегімен шығарыла бастаған. Жоба құны 4 млрд рубль (55 млн доллар). Орталықты Ресей тіке инвестиция қоры қаржыландырады.
Маусым және шілде айларында вакцинаны сынауға адамдар да қатысқан. Бірінші кезеңде – 38 азамат, 38 әскери қызметкер, екінші кезеңде 100 адам атсалысқан.
Ресей тіке инвестиция қорының мәліметінше, сынақ Сауд Арабиясы, Біріккен Араб Әмірліктері және Филиппинде жүргізілмек. Жақында Беларусь те вакцинаны сынақтан өткізуге келісім берген.
Қазақстанда Covid жұққан 900-ге жуық медицина қызметкері 2 млн теңге өтемақы алған
Қазақстанда кәсіби міндетін атқару кезінде коронавирус немесе вирустық пневмония жұқтырып алған 900-ге жуық медицина қызметкеріне мемлекеттік әлеуметтік сақтандыру қоры 2 млн теңгеден өтемақы төлеген. Бұл туралы сәрсенбі күні еңбек және халықты әлеуметтік қорғау министрлігі хабарлады. Коронавирустан қайтыс болған медицина қызметкері туралы мәлімет әзірге жаңармаған. Бұған дейін Covid-тен қайтыс болған үш медицина қызметкерінің отбасына өтемақы төленгені хабарланған еді.
"Коронавируспен күреске атсалысқан вирус жұқтырған 899 медицина қызметкеріне мемлекеттік әлеуметтік сақтандыру қорынан бір реттік әлеуметтік төлем төленді. Қор сонымен бірге аурудан қайтыс болған 3 медицина қызметкерінің туыстарына өтемақы берді" делінген министрлік хабарламасында.
Қазақстанда осыған дейін коронавирус жұққан медицина қызметкерінің 8 мыңнан асқаны хабарланған еді.
Қордың мәліметі бойынша, ең көп өтемақы төленген аймақтар арасында Нұр-Сұлтан қаласы (120), Алматы облысы (85), Алматы қаласы (84), Ақмола облысы (80), Батыс Қазақстан облысы (67) бар.
Заңға сәйкес, коронавирусты жұмыста жұқтырғаны дәлелденген медицина қызметкерлері ғана өтемақы ала алады. Коронавирус немесе коронавирустық пневмония жұқтырған медицина қызметкеріне – 2 млн теңге, коронавирустан қайтыс болған медицина қызметкеріне 10 млн теңге көлемінде өтемақы беріледі.
Көктем және жаз айларында кейбір аймақтарда медицина қызметкерлері "вирус жұқтырғандарды емдесек те, өтемақы алатындардың тізіміне ілінбедік" деп шағымданған болатын.
Қазақстанда бір күнде коронавирус пен пневмониядан 17 адам қайтыс болды
25 тамызда Қазақстанда белгілері коронавирусқа ұқсас пневмонияға 781 адам шалдыққан, 7 адам қайтыс болған. 351 адам жазылған. Бұл туралы сәрсенбі күні таңертең денсаулық сақтау министрлігі хабарлады.
Қазақстан үкіметі коронавирустық пневмония есебін 1 тамыздан бастап жүргізіп келеді. Тамыздың басынан осы күнге дейін коронавирустық пневмонияға барлығы 23 543 адам шалдыққан. Осы аралықта 268 адам қайтыс болған. 4 901 адам жазылған.
Ведомство мәліметінше, бір күнде Сovid жұққаны зертханалық талдаумен расталған 10 адам қайтыс болған. 585 адам жазылған. 13 наурыздан бері барлығы 1544 адам Covid-тен қайтыс болған. 93 990 науқас жазылған.
Қазір коронавирус инфекциясынан 9 541 адам емделіп жатыр. 49-ы – бала. 4 786 науқас стационарда жатыр. 305 адамның жағдайы – ауыр, 56 адамның жағдайы – өте ауыр. 47 адам жасанды тыныс алу аппаратымен демалып жатыр.
Дүниежүзілік денсаулық сақтау ұйымы (ДДСҰ) коронавирус пен белгілері коронавирусқа ұқсайтын ауруға шалдыққандар есебін біріктіруге кеңес берген. Ұйым ресми сайтында екі көрсеткішті біріктіріп көрсеткен. Ондағы мәліметке сәйкес, Қазақстанда 127 462 адам Covid-ке шалдыққан.
Қазақстан денсаулық сақтау министрлігі шілде айының ортасында бұл екі көрсеткішті біріктіретінін айтқанмен кейінірек бұл ниетінен айныған. Билік дерегі бойынша, елде 105 мыңнан астам адамға коронавирус жұққан.
Кейбір сарапшылар Қазақстанның ресми орындары берген Covid статистикаға күмән келтіреді.
Қазақстанда бір күнде 173 адамнан коронавирус анықталды
25 тамыз күні Қазақстанда коронавирус инфекциясын жұқтырғаны ПТР тестімен расталған 173 науқас тіркелді. Вирус жұқтырған 98 адамда ауру белгілері байқалған, 75 адамда Covid симптомдары болмаған. Бұл туралы денсаулық сақтау министрлігі хабарлады.
Дүйсенбі күні ең жоғары көрсеткіш – Шығыс Қазақстан облысында (27), ең төмен көрсеткіш Қызылорда облысында (1) тіркелген.
Қазақстанда эпидемия басталғалы барлығы 105 075 адамның коронавирус инфекциясын жұқтырғаны анықталған. Басым бөлігі (93 405) жазылған. 13 наурыздан бері барлығы 1523 адам қайтыс болған.
Ресми статистика бойынша, ПТР тестімен расталған науқастар саны жөніндегі аймақтағы жағдай мынадай:
Алматы қаласында – 14 129 (+21)
Нұр-Сұлтан қаласында - 13 763 (+16),
Атырау облысында - 10 862 (+17),
Қарағанды облысында – 9 997 (+19),
Шығыс Қазақстан облысында – 8 064 (+27),
Батыс Қазақстан облысында – 6 712 (+11),
Шымкент қаласында - 5 169 (+2),
Алматы облысында – 4 883 (+4),
Жамбыл облысында – 4 066 (+3),
Солтүстік Қазақстан облысында – 3 883 (+11),
Павлодар облысында – 3 797 (+6),
Қостанай облысында – 3 365 (+9),
Маңғыстау облысында – 3 327 (+5),
Ақмола облысында – 3 350 (+7),
Қызылорда облысында -3 229 (+1)
Түркістан облысында – 3 272 (+10),
Ақтөбе облысында - 3 207 (+4).
Дегенмен Қазақстанның ресми органдары берген Covid статистикасына инфекция жұқтырғаны ПТР тестімен расталған науқастар ғана кіреді. Белгілері коронавирусқа ұқсайтын бірақ ПТР тесті теріс нәтиже көрсеткен пневмонияға шалдыққандар бөлек есептеліп, жарияланып келеді. Ресми статистика бойынша, пневмонияның бұл түріне 1-24 тамыз аралығында 22 мыңнан астам адам шалдыққан. 261 адам қайтыс болған.
Елде жылдың алғашқы жеті айында барлығы 256 мың адам өкпе ауруына шалдыққан. Бұл – өткен жылдың дәл осы мерзіміндегі науқастар санынан 3,3 есе көп көрсеткіш. Денсаулық сақтау министрлігі мұның ішінде коронавирустық пневмонияның үлесін қанша екенін айтпады.