Бір күнде 1267 адамнан Covid пен пневмония анықталды, 34 өлім тіркелді
Қазақстанда 14 тамыз күні 439 адамнан ПТР тестімен расталған коронавирус және 828 адамнан белгілері бойынша коронавирусқа ұқсайтын пневмония анықталды. Тәулік ішінде коронавирустан 21 өлім, пневмониядан 13 өлім тіркелді.
Эпидемия басталғалы елде 102 287 адамның коронавирус жұқтырғаны ПТР тестімен расталған. Ал 1 тамыздан бері саналып отырған коронавирустық пневмония барлығы 17 494 адамнан анықталған, аурудан 211 адам қайтыс болған.
Қазақстан денсаулық сақтау министрлігі 1 тамыздан бастап ауру белгілері бойынша коронавирусқа ұқсайтын бірақ ПТР тесті инфекцияның барын анықтай алмаған вирустық пневмонияның санағын жүргізе бастады. Министрлік бұл шешімге елдегі медицина белсенділерінің талабы мен халықаралық қауымдастықтың назары Қазақстандағы жағдайға назары ауғаннан кейін барды. Өйткені Қазақстанда жаз басталғалы өкпе ауруына шалдығу мезгілсіз күрт өршіді. Денсаулық сақтау министрлігінің мәліметінше, 1 қаңтар мен 2 тамыз аралығында елде 256 мың адам пневмонияға шалдыққан. Оның ішінде бактериялық, зең және вирустық пневмония жағдайлары бар. Өткен жылдың осы мерзімімен салыстырғанда өкпе ауруына шалдығу 3,3 есе өскен.
Әуелі 17 шілде күні денсаулық сақтау министрі Алексей Цой 1 тамыздан коронавирустық пневмония дерегін Covid статистикасымен біріктіруге уәде еткен. Алайда 2 тамыздан бастап жарияланған статистикада пневмония мен коронавирус деректері бөлек көрсетілген. Джонс Хопкинс университетінің және worldometers.info сайтының Covid карталарындағы Қазақстан мәліметінде тек ПТР тестімен расталған науқастар саны ғана беріліп отыр. Ал Дүниежүзілік денсаулық сақтау ұйымы Қазақстандағы Covid және коронавирустық пневмония деректерін біріктіріп жариялап отыр. Екі деректі біріктірсе, Қазақстанда 119 781 науқас тіркелген болар еді.
Қазақстан статистикасына күдік келтіретіндер көп. Әуелі денсаулық сақтау министрлігі профилактикалық тестілеуді тоқтатып, тек ауру белгілері байқалған адамдар мен ауру адаммен байланыста болған адамдарды ғана тестілеуге көшкен. Яғни көптеген адам тестілеуден өтпеген. Ал Қазақстан билігі тек ПТР тестімен ғана коронавирус диагнозын қойып отыр. Елдегі дәрігерлер ПТР тестінің дәлдігіне күдік келтіреді. Алдымен тест сапасы нашар болуы мүмкін, одан кейін сынама алуда қателік кетуі мүмкін. Оның үстіне коронавирус жұқтырғаны тестімен расталған, бірақ өлім себебі "өзге аурудан" деген жүздеген науқас бар.
Қазақстанда вирус жұққан 8,5 медицина қызметкерінің 500-ден астамы өтемақы алған
Қазақстанда індет кезінде коронавирус жұқтырған 8,5 мың медицина қызметкерінің 500-і 2 млн теңгеден өтемақыны алған. Бұл туралы бас санитар дәрігер Айжан Есмағамбетова жұма күнгі брифинг кезінде айтты.
– 13 тамыз күнгі мәлімет бойынша, 500 медицина қызметкеріне 2 млн теңгеден өтемақы төленді. Комиссия тұрақты түрде жұмыс істеп жатыр. Құжаттар қаралып жатыр, – деді ол.
Оның сөзіне қарағанда өтемақы төлеу бойынша тізімді аймақтық комиссиялар құрастырады. Бас санитар дәрігер дегенмен нақты қанша дәрігердің өтемақы төлеу туралы өтініші қанағаттандырылмағанын айтқан жоқ.
Денсаулық сақтау министрлігінің 3 тамыз күнгі ресми мәліметіне сүйенген Vlast сайтының жазуынша, Қазақстанда індет кезінде 8 518 медицина қызметкеріне вирус жұққан. Бұл сол кездегі мәлімет бойынша коронавирус жұқтырғандардың 9,1 пайызына тең. Елде заңға сәйкес, коронавирусты жұмыста жұқтырғаны дәлелденген медицина қызметкерлері ғана өтемақы ала алады. Бұған дейін денсаулық сақтау министрлігі вирус жұқтырған дәрігерлердің көбіне коронавирус отбасы немесе таныстарынан жұққанын айтқан еді.
21 шілдеде денсаулық сақтау министрі Алексей Цой "республика бойынша 123 дәрігердің коронавирусты жұмыста жұқтырғаны анықталды, кәсіби міндетін атқару барысында 59 медицина қызметкері коронавирус жұқтырып, қайтыс болған" деп мәлімдеген еді.
Көктем және жаз айларында кейбір аймақтарда медицина қызметкерлері "вирус жұқтырғандарды емдесек те, өтемақы алатындардың тізіміне ілінбедік" деп шағымданған болатын.
Қазақстанда бір күнде коронавирус пен "пневмониядан" 31 адам қайтыс болған
Қазақстанда 13 тамызда белгілері коронавирусқа ұқсайтын пневмонияға шалдыққан 934 адам анықталған, 10 адам қайтыс болған. Бұл туралы денсаулық сақтау министрлігі хабарлады.
Министрліктің мәліметінше, 1-13 тамыз аралығында коронавирустық пневмонияға шалдыққан 16 666 адам анықталған. 198 адам қайтыс болған.
Ведомство коронавирустан қайтыс болғандар саны туралы да мәлімет берді. 13 тамызда коронавирустан 21 адам қайтыс болған. Эпидемия басталғалы бері елде коронавирустан кемінде 1356 адам көз жұмған.
Қазір коронавирус инфекциясынан 21 859 адам емделіп жатыр. 104-і – бала. 3,7 мыңнан астам науқас стационарда жатыр. 420 адамның жағдайы – ауыр, 103-інің жағдайы – өте ауыр. 80 адам жасанды тыныс алу аппаратымен демалып жатыр.
Дүниежүзілік денсаулық сақтау ұйымы әлем елдеріне оның ішінде Қазақстанға да коронавирус пен белгілері коронавирусқа ұқсайтын, бірақ зертханалық талдаумен расталмаған пневмония түрін біріктіруге кеңес берген. Көрші Қырғызстан шілде айының ортасында көрсеткішті біріктірген. Ал Қазақстан бастапқыда біріктіретінін мәлімдегенмен кейінірек бұл ниетінен айнып қалды. Егер екі көрсеткішті қосса, Қазақстанда коронавирус жұқтырғандар – 118 514 адамға жетеді. ДДСҰ ресми сайтында Қазақстандағы Covid статистикасын солай біріктіріп көрсеткен.
Ресми мәлімет бойынша, жыл басынан тамызға дейін пневмонияға (пневмонияның барлық түріне) 256 мың адам шалдыққан. Бұл – өткен жылдың алғашқы жеті айымен салыстырғанда 3,3 есе көп көрсеткіш. Былтыр осы аралықта өкпе ауруынан 2,3 мың адам қайтыс болса, биыл төрт мыңнан астам адам көз жұмған.
Қазақстанда өткен тәулікте 476 адамнан коронавирус инфекциясы анықталды
Қазақстанда өткен тәулікте 476 адамнан коронавирус инфекциясы табылған. Елде вирус жұқтырғандар 101 848 адамға жетті. Бұл туралы денсаулық сақтау министрлігі хабарлады.
Ведомство таратқан мәліметке қарағанда, Алматы мен Нұр-Сұлтанда вирус жұқтырғандар азайғанмен Шығыс Қазақстан облысында жағдай өзгермей отыр. 13 тамызда Алматыда – 40, Нұр-Сұлтанда – 66, ШҚО-да 97 адамға коронавирус инфекциясы жұққаны анықталған. Бейсенбі күні ең төменгі көрсеткіш Шымкентте (3) тіркелген.
Эпидемия басталғалы бері елде коронавирустан 1335 адам қайтыс болған деп айтылады. Бұған коронавирус жұққан, бірақ арнайы комиссия "Covid-тен емес, өзге ілеспе аурудан қайтыс болды" деп шешім шығарған жүздеген адамның өлімі енбеген. Кейбір мамандар Қазақстанның ресми орындары таратқан коронавирус статистикасына күмән келтіреді.
13 тамызда мемлекеттікк комиссия өкілдері елде эпидемиологиялық ахуал "тұрақталғанын" мәлімдеп, шілденің басында жарияланған карантин шараларын 17 тамыздан бастап жеңілдете бастайтынын хабарлады.
Қазақстан билігі вирус жұқтырғандардың жалпы саны 101 мыңнан асты дегенмен Дүниежүзілік денсаулық сақтау ұйымының мәліметінше, елде вирус жұқтырғандар саны 117 мыңнан асқан. Халықаралық ұйым белгілері коронавирусқа ұқсайтын пневмонияға шалдыққандарды да елдің Covid статистикасына қосып есептеп отыр.
Қазақстан денсаулық сақтау министрлігі басында "пневмонияны" Covid статистикасына қосатынын айтқанмен 10 тамызда бұл ниетінен айнығанын білдірді.
Денсаулық сақтау министрлігінің дерегінше, 1-12 тамыз аралығында 15 732 адамның коронавирустық пневмонияға шалдыққаны расталған, 188 адам қайтыс болған.